ಮಹಿಳಾ ಜಾಗೃತಿ ಗೀತೆ - 3

ಹೆಣ್ಣನು ಹಡದಿ ಎನ್ನುತ ಬೇಸರ
ಮಾಡುವಿರೇಕೆ ನೀವೆಲ್ಲಾ?
ಹೆಣ್ಣಿಂದ ತಾನೇ ಜಗವಿಂದು ಬೆಳೆವುದು
ಎಂಬುದು ತಿಳಿಯಬೇಕು ನಾವೆಲ್ಲಾ(2)

ಗಂಡಿನ ಹುಟ್ಟು ಹೆಣ್ಣಿನ ಹತ್ಯೆ
ಮಾಡುವಿರೇಕೆ ನೀವೆಲ್ಲಾ? 
ಹೆಣ್ಣಿಲ್ಲದ ಈ ಜೀವನ ಹೇಗೆ
ಎಂಬುದು ತಿಳಿಯಬೇಕು ನಾವೆಲ್ಲಾ (2)

ಗಂಡಿಗೆ ತುಪ್ಪ ಹೆಣ್ಣಿಗೆ ಏಕೆ?
ಕೇಳುವಿರೇಕೆ ನೀವೆಲ್ಲಾ
ಹೆಣ್ಣಿನ ಬಲದಲಿ ಜಗದ ಗೆಲುವಿದೆ
ಎಂಬುದು ತಿಳಿಯಬೇಕು ನಾವೆಲ್ಲಾ (2)

ಗಂಡಿಗೆ ಶಾಲೆ  ಹೆಣ್ಣಗೆ ಮದುವೆ 
ಎನ್ನುವಿರೇಕೆ ನೀವೆಲ್ಲಾ
ಹೆಣ್ಣೊಂದು ಕಲಿತರೆ ಶಾಲೆಯ ತೆರೆದಂತೆ
ಎಂಬುದು ತಿಳಿಯಬೇಕು ನಾವೆಲ್ಲಾ (2)

ಗಂಡು ಮೇಲು ಹೆಣ್ಣು ಕೀಳೆಂದು
ತಿಳಿಯುವಿರೇಕೆ ನೀವೆಲ್ಲಾ
ಹೆಣ್ಣು -ಗಂಡು  ಸಮಾನರಿಬ್ಬರು
ಎಂಬುದು ತಿಳಿಯಬೇಕು ನಾವೆಲ್ಲಾ(2)
ತಿಳಿದು ನಡೆಯಬೇಕು ನಾವೆಲ್ಲಾ(2)

- ವಿಜಯಲಕ್ಷ್ಮಿ ಎಂ ಎಸ್